करदाता सेवा कार्यालयहरु

नोट : मिति २०७७।०३।०८ को नेपाल राजपत्रमा सूचना प्रकाशित गरी स्थापना गरिने निर्णय भएका ३१ करदाता सेवा कार्यालयहरु मध्ये केहि स्थापना भएका र केहि स्थापनाको क्रममा रहेका छन् ।

* ठूला करदाता कार्यालय: साबिक मुल्य अभिवृद्धि कर विभागमा वार्षिक रु. ५ करोड भन्दा बढी करयोग्य कारोबार गर्ने करदाताको कर परीक्षण हुने व्यवस्था गरिएको थियो । विभाग एकीकरण भएपछि रु. १० करोडभन्दा बढी कारोबार हुने करदाताको कर परीक्षण विभागबाटै हुने प्रबन्ध मिलाइयो । २०६० माघ १ गते देखि ठूला करदाता कार्यालय स्थापना गरियो । हाल यो कार्यालयले वार्षिक ८० करोडभन्दा बढी करयोग्य कारोबार गर्ने करदाताको कर प्रशासन गर्दछ । ठूला करदाता कार्यालय ललितपुरमा रहेको छ ।

* मध्यमस्तरीय करदाता कार्यालय: २०७५ श्रावणदेखि वार्षिक रु. ४० करोडभन्दा बढी ८० करोडसम्म कारोबार भएका करदाताको कर प्रशासन गर्न यो कार्यालय स्थापना गरियो । मध्यमस्तरीय करदाता कार्यालय काठमाडौंमा रहेको छ ।

* आन्तरिक राजस्व कार्यालय: विभाग एकीकृत हुँदा आन्तरिक राजस्व कार्यालयको संख्या २२ थियो । २०७७ साल असारसम्म आइपुग्दा मुलुकभर रहेका आन्तरिक राजस्व कार्यालयको संख्या ४३ पुगेको छ । यी कार्यालयबाट वार्षिक रु.४० करोडसम्म कारोबार गर्ने करदाताको कर प्रशासन हुने गर्दछ ।

* करदाता सेवा कार्यालय: कर परीक्षण र अनुसन्धानको कामबाहेक करदाता दर्ता, कर संकलन र करदाता सेवा सम्बन्धी कार्य गर्न वि.सं. २०६६ देखि करदाता सेवा कार्यालय स्थापना गर्न थालिएको हो । २०७७ साल असारसम्ममा करदाता सेवा कार्यालयको सङ्खया ३९ पुगेको छ ।